Sahih bir hadisi sharifda Allohning Rasuli shunday marhamat qiladilar: "Kimki meni tushida ko'rsa, rostdan ham meni ko'ribdi. Chunki shayton mening suratga kira olmaydi". Boshqa bir sahih hadisi sharifda shunday deydilar. "Kimki tushida meni ko'rsa, muhaqqaq meni ko'rgandir". Boshqa rivoyatda esa: "Kimki meni tushida ko'rsa, haqiqatan, meni ko'rgan bo'ladi. Chunki shaytonning mening suratimga kirishi mumkin emas" degan xabar beriladi. Ibn Abu Jamra "Allohning Rasulini chiroyli ko'rinishda ko'rish tush ko'rganning diniy amallari go'zalligiga, chiroyli ko'rinishda ko'rmaslik yoki badanida nuqsonlar ko'rish tush ko'rgan kishining kamchiliklariga ishoradir",deydi. Tushda Allohning rasulini ko'rish har tomonlama yaxshilikka, muvaffaqiyatga, baxtga ishoradir. Ularni tushda ko'rgan kishi murodiga yetadi. Ularni sahobalarining, oila a'zolarining, qadrdon kishilarning orasida ko'rish misilsiz shon-sharafga erishishga ishoradir. Ularni tushda ko'rishdan kattaroq baxt yo'q. Tushda ularning huzurlariga kirishga muyassar bo'lish erishiladigan sharafning eng yuksagidir. Allohning salomi ularga bo'lsin. Tushda Payg'ambarimiz (s.a.v.)ni ko'rgan kishi ikki dunyo saodatiga erishadi. Qanday ishni boshlasa ham hayrli bo'ladi. Shunday tush ko'rgan kishi yashaydigan shahar (qishloq,mahalla) ahli ezgu ishlar qiladi, baxtiyor hayot kechiradi. Qiyinchiliklardan qutuladi. Kambag'al bo'lsa, mo'l-ko'lchilik va boylikka erishadi. Payg'ambarimiz (s.a.v.)ni tushda ko'rgan kishi davlat rahbari bo'lsa, dushmanni yengadi. Mamlakat hududini kengaytiradi. Yurtida tabiiy ofatlar, falokatlar bo'lmaydi. Qo'l ostidagi kishilar ulkan muvaffaqiyatlarga erishadi. Qur'oni Karimda shunday deyiladi: (Ey Muhammad alayhissalom), darhaqiqat, Biz Sizni barcha olamlaraga faqat rahmat (ya'ni, Ollohning rahmati - jannatiga yetaklovchi) qilib yubordik (Anbiy surasi 107-oyat) Biror kishi tushida Allohning Rasuli (s.a.v.)ni xafa holda ko'rsa, shu mintaqa xalqi yanglish e'tiqod yo'liga kirgani ma'lum bo'ladi. Bunday holatda tavba qilib, e'tiqodni yangilash kerak. Shunday qilinsa, boshlariga tushishi mumkin bo'lgan musibatlarning oldi olinadi.
|